تالدىقورعانعا ارنايى ىسساپارمەن سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ كەلدى.

اۋەلى اليك جاتقامباي ۇلى، الماتى وبلىسىنىڭ اكىمى اماندىق باتالوۆ، دەنساۋلىق ساقتاۋ باسقارماسىنىڭ باسشىسى ءومىرزاق نيازبەكوۆ باستاعان توپ وبلىستىق جۇقپالى اۋرۋلار اۋرۋحاناسىنا باردى.

اليك جاتقامباي ۇلى كومپيۋتەرلىك توموگرافيا، ساندىق رەنتگەن اپپاراتى، ەكى گەمودياليز اپپاراتى قويىلعان بولمەلەردى جانە جاتىن بولمەلەردى ارالادى. ءبىر مەزگىلدە 200 ادامدى ەمدەۋگە ارنالعان اۋرۋحانانىڭ 20 توسەگى جانساقتاۋ بولىمىنە ارنالعان. ەڭ باستى ماسەلە – جوعارى ساناتتى دارىگەر جەتىسپەۋشىلىگى مەن باسپانا. اق حالاتتى ابزال جاندارعا ارناپ 17 تۇرعىن ءۇي ساتىپ الىنعان ەكەن. ودان بولەك، دارىگەرلەرگە ارنالعان 60 پاتەر مەن جاتاقحانا سالىنۋدا. وندا ۇيلەنبەگەن جانە وتباسىلى ماماندارعا ارنالعان بولمەلەر بولادى.

اگەنتتىك ءتوراعاسى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ 288 ورىندىق جاڭا ستۋدەنتتەر ۇيىنە بارىپ، «سانالى ۇرپاق» كلۋبىنىڭ كوشباسشىلارىمەن جانە «ىزگىلىك ەلشىلەرى» ەرىكتىلەر قوزعالىسىنىڭ بەلسەندىلەرىمەن كەزدەستى.

جىل باسىندا اشىلىپ، قولدانۋعا بەرىلگەن «Open Taldyqorgan» سەرۆيستىك اكىمدىگىندە بۇگىنگى كۇنى 8 قىزمەتكەر جۇمىس ىستەيدى. بۇگىنگى كۇنگە دەيىن 9517 ءوتىنىش قارالىپ، 491 مەملەكەتتىك قىزمەت كورسەتىلدى.

ساپار سوڭىنان سالتانات سارايىندا قوعام بەلسەندىلەرىمەن، بيزنەس-قوعامداستىقپەن جانە ب ا ق وكىلدەرىمەن اشىق كەزدەسۋ ءوتتى. جيىن پرەزيدەنت قاسىم-جومارت توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە ازاماتتىق قوعاممەن سىندارلى ديالوگ قۇرۋ ماقساتىندا وتكىزىلدى.

سىبايلاس جەمقورلىققا قارسى ستراتەگيانى وبلىسىمىزدا جۇزەگە اسىرۋ باعىتىندا ءبىرقاتار ءىس-شارا كەشەنى قولعا الىنعان. سونداي-اق، 15-تەن اسا جوبا سىبايلاس جەمقورلىقتىڭ الدىن الۋعا باعىتتالعان. بۇل جونىندە ايماق باسشىسى اماندىق باتالوۆ:

– بۇگىندە اكىمدىك تاراپىنان كورسەتىلەتىن مەملەكەتتىك قىزمەت 83 پايىزعا جۇيەلەنگەن. جىل سوڭىنا دەيىن كورسەتكىشتى 90 پايىزعا جەتكىزۋ جوسپاردا بار. جەر رەسۋرستارى كارتاسىنا جەردىڭ 7 كاتەگورياسى ەنگىزىلدى. سوڭعى 2 جىل ىشىندە 809 مىڭ گەكتاردان اسا جەردىڭ قولدانىستا ەمەستىگى انىقتالدى. ونىڭ 569 مىڭ گەكتارى اۋىلشارۋاشىلىق سالاسىن دامىتۋعا ءبولىندى. 100 مىڭ گەكتارى مەملەكەت يەلىگىنە قايتارىلدى، – دەگەن اماندىق عابباس ۇلى وبلىس كولەمىندە سىبايلاس جەمقورلىقتىڭ الدىن الۋعا باعىتتالعان جۇمىستارمەن تانىستىردى.